Ammedi Dokati (అమ్మెడి దొకటి)

అమ్మెడి దొకటి అసిమలో దొకటి
బిమ్మిటి నిందేటి పెద్దలమయ్యా    ॥ పల్లవి ॥

సంగము మానక శాంతియుఁ గలుగదు
సంగలంపటము సంసారము
యెంగిలిదేహం బింతకు మూలము
బెంగల మిందేటి పెద్దలమయ్యా    ॥ అమ్మెడి ॥

కోరికె లుడుగక కోపం బుడుగదు
కోరకుండ దిక్కువ మనసు
క్రూరత్వమునకు కుదువ యీ బ్రదుకు
పేరడి నేమిటి పెద్దలమయ్యా      ॥ అమ్మెడి ॥

ఫలము లందితే బంధము వీడదు
ఫలముతో తగులు ప్రపంచము
యిలలో శ్రీవేంకటేశు దాసులము
పిలువఁగ నేమిటి పెద్దలమయ్యా    ॥ అమ్మెడి ॥