Anganamohamu Neepai (అంగనమోహము నీపై)

అంగన మోహము నీపై నటువంటిదా
యింగిత మెఱఁగవా నీ వింత దొరవు      ॥పల్లవి॥

సిగ్గువడి యాపె నీతో శిరసు వంచుకుండఁగా
దగ్గర లోఁగే వదేమి దంటవాఁడవు
యెగ్గున నీ వలఁ(ల్లఁ?) దప్పు యేమైనాఁ గలదోనేఁడు
వొగ్గి నీకు ఆపె యిందు వొరటులాడీనా    ॥అంగ॥

కన్నెపాయ మటుగాన కాంత పలుకఁగ వుంటే
పన్ని యేల పైఁకొనవు ప్రౌఢవాఁడవు
యెన్నికలు యేమైనా యెంచుకొన్నవిఁగలవో
అన్నిటా నీ వేమనినా అవుఁగాదనీనా    ॥అంగ॥

నెలఁత నిన్నుఁ గలసి నివ్వెరగైయుండఁగాను
యెలయించకు శ్రీ వేంకటేశ్వరుఁడవు
అలుకదేరి కూడితి వాస లేమైనాఁ గలవో
చెలియ నీ చెప్పినట్లు సేయకమానీనా    ॥అంగ॥