Akkada Jeliyalapu (అక్కడ జెలియలపు)

అక్కడఁ జెలి యలపు యిక్కడ నీ గెలుపు
యిక్కడ నక్కడఁ గంటి మిఁక నీచిత్తము       ॥ పల్లవి ॥

వ్రాసేటి నేలలవ్రాఁత వాఁకలచెమటయీఁత
గాసిలు నూర్పులమోఁత కాంతపాలాయ
బేసబెల్లిలేనగవు పిలువఁగానే బిగువు
వేసాలయీతగవు విభుఁడ నీపాలు       ॥ అక్క ॥

చెలిమూపుపై నొరగు చిత్తములో నివ్వెరగు
చలిజింతలపొరుగు సతిపాలాయ
వెలినుండేనిక్కచూపు వెడబొంకు రేపుమాపు
నిలువులతరితీపు నీపాలాయ        ॥ అక్క ॥

కాఁగిటిలో తమకము కదిసినగమకము
దాగి యిట్టెసముకము తరుణిపాలు
వేగి శ్రీవేంకటపతివేడుకైనసమరతి
యీగతి మెచ్చినమతి యిది నీసాలాయ    ॥ అక్క ॥