Adaku Boyiraavayyaa Annee (ఆడకుఁ బోయిరావయ్యా అన్నీ)

ఆడకుఁ బోయిరావయ్యా అన్నీ విన్నవించేఁగాని
యీడ మాతోడి పొందులు యేకాలముఁ గలవే ॥ పల్లవి ॥

చిత్తము రంజిల్ల నీవే చెప్పినట్టల్లాఁ జేసి
మెత్తనిమాట లాడి మెప్పించె నాపె
గుత్తపు గుబ్బలు పోఁక కొప్పు నీకుఁ జక్కఁబెట్టి
చిత్తజకేళికి నిన్నుఁ జిమ్మిరేఁచె నాపె      ॥ ఆడ ॥

తనపైఁ బరాకుసేసి తమి నీకు బుట్టించి
వినయములనే దక్కఁగొనె నిన్నాపె
కొనగోలు మోవ చెక్కుఁలను జవ్వాది మెత్తి
కనుసన్న రతులకుఁ గైకొలిపె నాపె      ॥ ఆడ ॥

తెమఱఁగుకుఁ దీసి తియ్యనిమోవి యొసగి
మరిగించె నలమేలుమంగే యాపె
గరిమ శ్రీవేంకటేశ కలసితి విటు నన్ను
సరసపునవ్వులు చవిచూపె నాపె      ॥ ఆడ ॥