Aanateevayya Naatinu (ఆనతీవయ్య నాతోను)

ఆనతీవయ్య నాతోను అల్లదివో చెలియ
పూని నీ మన్నన లెట్టు పొసఁగించేవయ్యా   ॥ పల్లవి ॥

దప్పిదేరే మోముతోడ తరుణి నిన్నుఁ బిలిచీ
అప్పుడాడిన మాట కేమంటివయ్యా
చిప్పిలుఁ జెమటతోడ చేసన్నసేసి నందుకు
ఇప్పుడు నీచిత్తములో నెట్టున్నదయ్యా    ॥ ఆన ॥

సిగ్గుతోడఁ దలవంచీ చెలులచేతనంపిన
అగ్గపుఁగానుక లేమ నందితివయ్య
వెగ్గళించి ఆపె నిన్ను వేసినపూల చెండు
దగ్గరి నీకళ యేడ దాఁకెనయ్యా       ॥ ఆన ॥

కొంగువట్టి తీసి తానే కూరిమి గొసరితేను
వుంగిటి నీమొగ మెట్టోడివయ్య
ఇంగితాన శ్రీ వేంకటేశ కూడితి రిద్దరు
పొంగేటి వలపు లెందు వోసేవయ్యా    ॥ ఆన ॥