Amdaramu Namdarame (అందరము నందరమె)

అందరము నందరమె అవుఁగాదనఁగలమా
పొందులు గావించ నేర్చు పుష్పాస్త్రుఁ డొకఁడె    ॥ పల్లవి ॥

బలిమికాడవు నీవు పాయపుదాన నేను
మెలుపురాలవంటివి మేఁటి చన్నులు
తలపోయ నిఁక మంచితనము లెట్టబ్బునో
వలరాజొక్కఁడె నేర్చు వైపులుగావింపను     ॥ అంద ॥

నాములెక్కు నీ నవ్వులు నాతలము బెట్టదము
గామిడి నా చూపులు కడు గబ్బులు
యేమని పొసఁగించే దెవ్వరించు కోపుదురు
కాముఁడొక్కఁడె నేర్చు కైవసము సేయను     ॥ అంద ॥

శ్రీవేంకటపతివి చేకొంటివి నీ దేవిని
హివిరి నావలపిది వలవంటిది
చేవదేరేరతులను చిక్కుదేరే దేగతినో
భావజుఁడొక్కఁడే నేర్చు పంత మీడేరించను    ॥ అంద ॥