Adugare Yeemaata Aatani (అడుగరే యీమాట ఆతని)

అడుగరే యీమాట ఆతని మీరందరును
యెడయని చోటను ఇగిరించుఁ బ్రియము     ॥ పల్లవి ॥

పొరపొచ్చమగుచోట పొసఁగవు మాటలు
గరిమ నొరసితేను కలఁగు మతి
సరవులు లేనిచోట చలము వెగ్గళమవును
వొరసి పెనఁగేచోట నుమ్మగిలు వలపు        ॥ అడు ॥

వొలసీనొల్లనిచోట వొనరవు నగవులు
బలిమి చేసేటిచోట పంతమురాదు
అలుకలు చూపేచోట అమరదు వినయము
చలివాసివుండేచోట చండిపడుఁ బనులు      ॥ అడు ॥

ననుపులేనిచోట నమ్మికచాలదు పొందు
అనుమానమైనచోట నంటదు రతి
యెనసినాఁడు శ్రీవేంకటేశుఁడు నన్నింతలోనె
తనివిలేనిచోట దైవారుఁ గోర్కులు           ॥ అడు ॥