Amdariki Daarukaana (అందరికి దారుకాన)

అందరికిఁ దారుకాణ లౌఁగదరె చెలులాల
పొందుగా నీరీతుల భోగించుటే నేరుపు    ॥ పల్లవి ॥

వినయముతోఁ జెప్పినవిందు కడుఁగడుఁజవి
ననువుతో నవ్విననవ్వుచవి
మనసురా మాటాడిన మంతన మెప్పుడుఁజవి
పనిపూని వలచినపతికి సతికిని        ॥ అంద ॥

యితవుతోనాడించేయెడమాటలే ఇంపు
తతి నెదురుచూపుల తమక మింపు
చతురతఁ బెనఁగేటిసరసపుఁ జేఁత లింపు
అతికాంక్ష మెలఁగేటియాలికి మగనికి      ॥ అంద ॥

గుట్టుతోడఁ గూరిములు గొసరుటే వేడుక
చుట్టుక రతుల మెప్పించుటే వేడుక
వొట్టుకొన్న కూటముల నుమ్మగిలుటే వేడుక
అట్టె శ్రీవేంకటేశు కలమేలుమంగకూ     ॥ అంద ॥