Addamaraatirikaada Alapu (అద్దమరాతిరికాఁడ అలపు)

అద్దమరాతిరికాఁడ అలపు చూడక వచ్చె
వొద్దికతోఁ బీఁటపై గూచుండఁ బెట్టుకోవయ్యా    ॥ పల్లవి ॥

సారె జాఱుఁదురుముతో సతి నీ ఇంటికి రాఁగా
జీరల చెమటగారీఁ జెక్కులవెంట
చేరి సురటి విసరి చెంగలువలు ముడిచి
గారవించి పరపుపైఁ గాఁగిలించుకోవయ్యా     ॥ అద్ద ॥

పయ్యదకొం గెడలఁగఁ బరువున రాఁగాను
కయ్యమడిచీఁ జన్నులు కదలఁగను
చెయ్యి వురమున మోపి చెంగావిదుప్పటి గప్పి
వుయ్యాలమంచము మీఁద వొద్దికచూపవయ్యా   ॥ అద్ద ॥

గందపుబొట్టు కలసి నిన్నంటరాఁగా
చిందేటిమోవితేనెలు చిప్పిలీని
కందువ మోవి యాని కస్తూరి నుదుటఁ బూసి
పొందుల శ్రీవేంకటేశ పొసఁగించుకోవయ్యా    ॥ అద్ద ॥