Anateevayya Anumaanimchaka (ఆనతీవయ్య అనుమానించక)

ఆనతీవయ్య అనుమానించక
దానికేమి యింకఁ దప్పుగాదు    ॥ పల్లవి ॥

రవ్వలుసేసిటు రావైతివి నిన్న
నవ్వులు నవ్వఁగ నమ్మితిని
యెవ్వరో చెప్పఁగ నీడ నున్నాఁడవు
చివ్వన వలపులు చే చిక్కీనా    ॥ ఆన ॥

అగడుగ నాకెఅండనే వుంటివి
మొగము చూడఁగా మొక్కితిని
వెగటుదీరఁగ వీడెమిచ్చేవీడ
తగవుతో దయదలఁచితివా    ॥ ఆన ॥

దీ(ధీ?)రత వెంటనే తెచ్చితి వొకతెనుఁ
గోరి మన్నించఁగఁ గూడితిని
యీరీతి శ్రీవేంకటేశ చొక్కితి విందు
యేరా చనవెల్లా నిచ్చితివా    ॥ ఆన ॥