Amdulake Vichaarimche (అందులకె విచారించే)

అందులకె విచారించే నప్పటనుండి
కందువకుఁ బెనఁగఁగా గబ్బి ననవు గదా    ॥ పల్లవి ॥

పచ్చిదేర నీతో నేను పక పక నవ్వఁగాను
అచ్చలాన మందెమేళ మనవుగదా
మచ్చికతో సారెసారె మాటపలు కాడఁగాను
రచ్చలోన నిది యెంత రట్టడెనవుగదా    ॥ అందు ॥

సతమై యే పొద్దూ నే నీ సరుసఁ గూచుండఁగాను
అతిగర్వియంటా నన్ను ననవుగదా
తతిగొని యెప్పుడూ బాదమును నే నొత్తఁగాను
మితిమీరి మిక్కిలి గామిడి యనవుగదా    ॥ అందు ॥

గుట్టుతో గాఁగిట నేను గుబ్బల నిన్నొత్తఁగాను
అట్టె యాసోదకతై ననవుగదా
గట్టిగా శ్రీవేంకటేశ కలసితి విటునన్ను
బట్టువలెఁ గొనేడఁగ బగ్గడెనవుగదా      ॥ అందు ॥