Aanatiyyavayyaa Naato Nakkadi (ఆనతియ్యవయ్యా నాతో నక్కడి)

ఆనతియ్యవయ్యా నాతో నక్కడి సుద్దు లెల్లాను
పూని నా కాఁగిట నిట్టె భోగించేవుగాని     ॥ పల్లవి ॥

ఇందాఁకా నీ వాకె ఇంటనుండి వచ్చితివి
విందు వెట్టెనా నీకు వేడుకతోను
గందము పూసుకొంటివా కానవచ్చీ మేనను
పొందుగ విడెమిచ్చెనా పుక్కిట నీకున్నది   ॥ ఆన ॥

నానిన చెమటలతో నవ్వుతా నున్నాఁడవు
పానుపు వరచెనా పాదాలొతైనా
వీనులలో నేమైనా విన్నపాలు సేసెనా
ఆనెనా చన్నులు వురమందు గురుతున్నది  ॥ ఆన ॥

గరిమతో సంతోసాలు కానిపించీ నీమోమున
సరసము లాడెనా చల్లెనా సేస
యిరవై శ్రీవేంకటేశ యీడ నన్ను నేలితివి
మరిగి తాఁ గూడెనా నీమనసులో నున్నది  ॥ ఆన ॥