Amdaritodi Paatu (అందరితోడి పాటు)

అందరితోడి పాటు అట్టే కానీవయ్య
సందడించి వేఁడుకోఁగా చలపట్టేనా    ॥ పల్లవి ॥

కప్పురాలు మాఁటలు కారాలు చేఁతలు
యెప్పుడు మీ పొందులు సతు లెట్టు సేతురో
తప్పు వట్టరాదు నీకు తమక మెంతైనా గద్దు
నెప్పున నీ యానతి నేఁ గాదనేనా      ॥అంద॥

నిగరాలు బాసలు నెరుసలు మాయలు
మగువలు నీకే యెట్టు మరుపుదురో
తగవులే నెరపేవు దైవారీ వలపులు
నిగిడి నీ యానతి నేఁ గాదనేనా       ॥అంద॥

చెలువము మొగము చెనకులు మేనెల్ల
బలిమి నీ యింతు లెట్టు భ్రమఁ జిక్కిరో
కలసితి విటు నన్ను గక్కన శ్రీ వేంకటేశ
నెలవై నీ యానతి నేఁ గాదనేనా      ॥అంద॥