Aadukogalige Maaku Nandaramu (ఆడుకోఁగలిగె మాకు నందరముఁ)

ఆడుకోఁగలిగె మాకు నందరముఁ జెలులము
జాడల సతులు నీ సరి యెవ్వరమ్మా     ॥ పల్లవి ॥

అదివో పతిఁ బిలువ నంపి రప్పించుకొంటివి
యెదుట నాపనితొడ యెక్కుకొంటివి
మెదలనియ్యక అట్టె మెడగట్టించుకొంటివి
వెదకి పువ్వులదండ వేసి తీసి కొంటివి    ॥ ఆడు ॥

తేరాని వైనాఁ జెప్పి తెప్పించుకొంటివి నీవు
మేరలు సేసుక వీఁపుమీఁద నుంటివి
కూరిమి నీవే దక్కించుకొంటి వడవుల వెంట
చేరి పచ్చనిఅలమై శిరసు నిండితివి   ॥ ఆడు ॥

విందుల నీవే పదారువేలు రూపులై మించితి
వెందు నీపేరే మొదల నెంపించితివి
కందువ శ్రీ వేంకటేశు కాఁగిటిలోపల నిండి
సందడిం చాతనిసర్వసంపదవు నైతివి  ॥ ఆడు ॥