Amdu Kamtinate Nee Yamdamu (అందు కంటినటే నీ యందము)

అందు కంటినటే నీ యందము లెంచితిఁ గాక
చిందేటి నా మోహము నీచేతఁ జిక్కెఁ గదరా   ॥ పల్లవి ॥

నడుము పిడికెఁడంత నాతి నీకుచములైతే
బడి నొకటే పట్టెఁడంత
యెడ నాయంగము లివి యెంతలెంతలైనాను
చిడుముడి నిన్నయు నీచేతిలోనేకదరా    ॥ అందు ॥

మొగము గొడిఁదెఁడంత మోహనపుఁగనుదోయి
చిగురుఁబో డిదియేమే చేరఁడంత
యెగసక్కె మిఁకనేల యేర నే నెట్టుంటినాను
జిగి నాసింగారము నీచేతిలోనేకదరా     ॥ అందు ॥

సుదతి నీయడుగులు జుట్టెఁడంత, దేహమైతే
సదరమైనయేడు జానలంత
కదిసితి విదె శ్రీవేంకటపతి విటు నన్ను
చెదరని నేను నీచేతిలోనే కదరా        ॥ అందు ॥