Amdukaite Dosamuledamti (అందుకైతే దోసములేదంటి)

అందుకైతే దోసము లేదంటి మింతే నేము
సందడి జాణవు నీవు సమ్మతించుకొందుగా   ॥ పల్లవి ॥

రేయిఁబగలును నీరేపల్లెలో చేఁతలు
ఆయాలు మోవఁగా నిన్నునాడెఁగా చెలి
యీయెడనైతే నేము యింతేసికి నోపము
పాయపు వాఁడవు మాటఁబడ నోపుదువుగా    ॥ అందు ॥

గుఱుతైన యట్టినీ కొలనిలో చేఁతలు
వెఱవక నిన్ను వెలివేసెఁగా ఆపె
తెఱవల మింతేసి తెగువకుఁ జాలము
నెఱతనీఁడ విన్నిటా నీకు నవ్వవచ్చుగా    ॥ అందు ॥

యింపుమీర నాఁటదాని నెత్తుకవచ్చినవింద
ముంపున నీమీఁద నిట్టె మోపెఁగా ఆపె
జంపుల శ్రీ వేంకటేశ సరి నిన్నింత నేఁ జేయ
అంపక నన్నుఁ గూడితి వన్నియు నేర్తువుగా   ॥ అందు ॥