Amtayunu Ninnu Bomdeyamdukorake (అంతయును నిన్ను బొందేయందుకొరకే)

అంతయను నిన్నుఁ బొందేయందుకొరకే
వింత సేసుక యిందుకు విసిగేవు సుమ్మీ   ॥ పల్లవి ॥

అంకెకు రానివేళ నాడుదు మే మైన నిన్ను
పొంకము వచ్చినవేళ పొగడుదుము
సంకె లేని మావంటి సతులకు నిది వోజ
పంకించి నీ విందు కెగ్గు పట్టేవు సుమ్మీ    ॥ అంత ॥

బగి వాసి వున్న వేళ పగ చాటుదుము నిన్ను
మొగము చూచితేనె మొక్కుదుము
యెగసక్కేలె మావంటి యింతులకు సహజము
అగ డైతి నని నీవు అలిగేవు సుమ్మీ       ॥ అంత ॥

తక్కించినప్పటివేళ తరిఁ జలపట్టుదము
గక్కనఁ గూడితేనె కరఁగుదుము
దక్కితి శ్రీవెంకటేశ తతి నలవేల్‌మంగను
వొక్క టైతి విది నాకు వొడఁబాటే సుమ్మీ  ॥ అంత ॥