Ape Neeku Meludi (ఆపె నీకు మేలుది)

ఆపె నీకు మేలుది నీవాపెపై బత్తిగలవు
చేపట్టి కరుణతోడఁ జిత్తగించవయ్యా   ॥ పల్లవి ॥

వెలఁది మాఁటలు నీకు విన్నపము సేసితివి
సొలసి గురుతు లెల్లాఁ జూపితిమి
పిలిచితి మింటికిని ప్రియములు చెప్పితిమి
అలరి మారుత్తరము లానతియ్యవయ్యా ॥ ఆపె ॥

కమ్మటి నాకె యంపిన కానుకలు నిచ్చితిమి
ముమ్మాటి దాఁకా నీకు మొక్కితిమి
నెమ్మది నీబాసలు నీకుఁ దలఁపించితిమి
యిమ్ముల నీచిత్త మిఁక నెట్టున్నదయ్యా ॥ఆపె ॥

చుట్టపు వరుసలెల్లా సొంపుగాఁ దెలిపితిమి
బెట్టుగా నాపెచే సేస వెట్టించితిమి
యిట్టె శ్రీవేంకటేశ యేలితివి; తా సిగ్గుతో
గుట్టున నున్నది తనగుణము మెచ్చవయ్యా ॥ ఆపె ॥