Amaramganalade (అమరాంగనలదె)

అమరాంగన లదె యాడేరు
ప్రమదంబున నదె పాడేరు       ॥ పల్లవి ॥

గరుడవాహనుఁడు కనకరథముపై
యిరవుగ వీధుల నేఁగీని
సురలును మునులును సొంపుగ మోఁకుల
తెరలిచి తెరలిచి తీసేరు       ॥ అమ ॥

యిలధరుఁడదివో యింద్రరథముపై
కెలయుచు దిక్కులు గెలిచీని
బలు శేషాదులు బ్రహ్మశివాదులు
చెలఁగి సేవలటు సేసేరు      ॥ అమ ॥

అలమేల్మంగతొ నటు శ్రీవేంకట
నిలయుఁ డరదమున నెగడీని
నలుగడ ముక్తులు నారదాదులును
పొలుపు మిగులఁ గడుఁ బొగడేరు   ॥ అమ ॥