Ammavaru Nayyavaru (అమ్మవారు నయ్యవారు)

అమ్మవారు నయ్యవారు నండనె కూచున్నవారు
యిమ్ముల నిద్దర జాణ లేమందమే       ॥ పల్లవి ॥

కొల్లున నవ్వీ నతఁడు గుట్టున నున్నది యాకె
తెల్లవారుదాఁకా మాఁటదిద్దనె పట్టె
పల్లద మాతనివంక పంతము లీచెలివంక
యిల్లిదె యిద్దరూ సరె యేమందమే      ॥ అమ్మ ॥

తొక్కుఁ బాదము లతఁడు తొరలి పెనఁగు నీకె
చెక్కులు నొక్కి బుద్దులు చెప్పనె పట్టె
మొక్కల మాతనిపాలు మురిపె మీసతిపాలు
యెక్కెఁజల మిద్దరికి నేమందమే        ॥ అమ్మ ॥

చేతులు చాఁచు నతఁడు సిగ్గుననుండు నీకె
యీతల విడే లిద్దరి కియ్యనె పట్టె
ఆతఁడు శ్రీవెంకటేశుఁ డలమేలుమంగయింతి
యేతుల నిద్దరూఁ గూడి రేమందమే      ॥ అమ్మ ॥